სტიპენდიები და გაცვლითი პროგრამები

მაცუმის საერთაშორისო ფონდმა (The Matsumae International Foundation) გამოაცხადა სტიპენდიების პროგრამა 2012 წლისათვის.

სტიპენდია საშუალებას აძლევს მკლევარებს 3-დან 6 თვის განმავლობაში განახორციელონ კვლევა იაპონიაში მათ მიერ შერჩეულ დაწესებულებაში: უნივერსიტეტების კვლევით ლაბორატორიებში, ეროვნულ კვლევით დაწესებულებებში, ასევე კერძო დაწესებულებებში. ამ მიზნით ფონდმა სულ 20 სტიპენდია გამოყო.
სტიპენდიები განკუთვნილია პირებისათვის, რომლებიც არ არიან იაპონიის მოქალაქეები და აკმაყოფილებენ შემდეგ კრიტერიუმებს:
•    უნდა გააჩნდეთ დოქტორის ან მასთან გათანაბრებული აკადემიური ხარისხი;
•    მათი ასაკი უნდა იყოს 40 წლის ქვემოთ;
•    უნდა ფლობდნენ ინგლისურ ან იაპონურ ენას საკმაოდ კარგად რათა დაუბრკოლებლად შეძლონ კვლევის განხორციელება;
•    არ უნდა იყვნენ იაპონიაში ნამყოფი;
•    უნდა ჰქონდეთ სტაბილური სამსახური და პროფესია რათა სტიპენდიის ამოწურვის შემდეგ დაბრუნდნენ თავიანთ ქვეყანაში;
•    თუ აპლიკანტი უკვე მონაწილეობდა მაცუმის საერთაშორისო ფონდის სტიპენდიების პროგრამაში, მას არა აქვს მეორედ მასში მონაწილეობის უფლება.

კვლევის საწარმოებლად პრიორიტეტული სფეროებია: საბუნებისმეტყველო მეცნიერებები, საინჟინერო საქმე და მედიცინა.

დაინტერესებულმა კანდიდატებმა ელექტყრონულად უნდა გაგზავნონ შემდეგი დოკუმენტაცია:
•    სააპლიკაციო ფორმა;
•    კვლევითი პროექტის თეზისები;
•    გამოქვეყნებულ ნაშრომთა სრული სია;
•    განსაკუთრებით მნიშვნელოვანი ნაშრომის ბეჭდური ვარიანტი;
•    რეზიუმე (CV);
•    სარეკომენდაციო წერილი;
•    აკადემიური ხარისხის ფლობის დამადასტურებელი დოკუმენტაციის (დოკუმენტაციების) დამოწმებული ასლი (ასლები);
•    მიწვევის წერილი იაპონელი მეცნიერისაგან;

დაინტერესებულმა პირებმა საჭირო დოკუმენტაცია უნდა წარადგინონ საქართველოში იაპონიის საელჩოში არაუგვიანეს 2011 წლის 25 მარტისა.

დამატებითი ინფორმაციისათვის მიმართეთ ილიას სახელმწიფო უნივერსიტეტის სტუდენტური სერვის ცენტრის დასაქმების, დაბინავებისა და სტიპენდიების განყოფილებას მისამართზე: ჭავჭავაძის გამზ. №32, ოთახი C 220,  ტელ.: 822 29 47 11.