ღირებულებები

ილიას სახელმწიფო უნივერსიტეტი ითვალისწინებს საქართველოსა და ევროპის უმაღლესი განათლების ძირითად მიზნებსა და პრინციპებს, საზოგადოების განვითარებისა და კეთილდღეობის საფუძვლების შექმნაში უმაღლესი განათლების როლს და 2024-2030 წლების საქმიანობას და სტრატეგიას აფუძნებს შემდეგ ღირებულებებსა და პრინციპებზე:

1. ავტონომიურობა – უნივერსიტეტი არის ავტონომიური საგანმანათლებლო დაწესებულება, რომელიც კანონის ფარგლებში დამოუკიდებლად იღებს გადაწყვეტილებებს თავისი ძირითადი საქმიანობის სრულყოფილად წარმართვისთვის;
2. თანაბარი შესაძლებლობები, თანასწორი და ღირსეული გარემო – უნივერსიტეტში სტუდენტებისათვის, აკადემიური და ადმინისტრაციული პერსონალისათვის უზრუნველყოფილია სწავლის, სწავლების, მუშაობისა და განვითარების თანაბარი შესაძლებლობები, რაც გულისხმობს როგორც არჩევანის თავისუფლებას, ასევე უნივერსიტეტის მხრიდან არჩევანის შესაბამისი ქმედებების განხორციელებაში ხელშეწყობას. უნივერსიტეტი უზრუნველყოფს სამართლიან და თანაბარ გარემოს საზოგადოების ყველა წევრისთვის, განურჩევლად წარმომავლობის, მოქალაქეობის, აღმსარებლობის, რელიგიის, სქესის, გენდერის, სექსუალური ორიენტაციის, ასაკის, ოჯახური მდგომარეობის, ფიზიკური და/ან ფინანსური შესაძლებლობებისა;
3. მრავალფეროვნება – უნივერსიტეტი არის საგანმანათლებლო დაწესებულება, რომელშიც წახალისებულია კულტურული, საგანმანათლებლო და კვლევითი საქმიანობის მრავალფეროვნება, როგორც საზოგადოებრივი ღირებულებების შექმნის საფუძველი;
4. აკადემიური თავისუფლება – უნივერსიტეტი უზრუნველყოფს სამეცნიერო/აკადემიური პერსონალისა და სტუდენტებისათვის აკადემიურ საქმიანობასთან დაკავშირებული არჩევანის და მისი განხორციელების თავისუფლებას;
5. სოციალური პასუხისმგებლობა – უნივერსიტეტი გრძელვადიანი და მიზანმიმართული მიდგომით ახორციელებს პროექტებს, რომლებიც უნიკალური სამეცნიერო და ადამიანური რესურსის გამოყენებით ემსახურებიან საზოგადოების მდგრად განვითარებას, გლობალური და ეროვნული გამოწვევების დაძლევას;
6. კეთილსინდისიერება – უნივერსიტეტის საქმიანობის უმთავრესი კრიტერიუმია კეთილსინდისიერება სწავლა/სწავლებისა და კვლევის პროცესში;
7. გამჭვირვალობა და ღიაობა – უნივერსიტეტი ანგარიშვალდებულია საზოგადოების წინაშე, პროაქტიულად ავრცელებს ინფორმაციას საქმიანობის თაობაზე და ღიაა თანამშრომლობისათვის;
8. განვითარებაზე ორიენტირება – უნივერსიტეტი პროაქტიულად აფასებს საკუთარ საქმიანობას, ეძებს სუსტ მხარეებს და ზრუნავს მათ აღმოფხვრაზე.