სამეცნიერო პიკნიკი 2022

1-ელ ოქტომბერს ილიას სახელმწიფო უნივერსიტეტის ეზოში გაიმართება მე-9 სამეცნიერო პიკნიკი.

პიკნიკის მიზანია მეცნიერების პოპულარიზაცია ნებისმიერი ასაკის დამთვალიერებლისთვის თანამედროვე მეცნიერების მიღწევათა სახალისო და საინტერესო ფორმით.

წლევანდელი სამეცნიერო პიკნიკის თემაა გაერთიანებული ერების მდგრადი განვითარების 17 მიზანი, ფოკუსირებული განათლებაზე; მხარდამჭერია საქართველოში გაეროს წარმომადგენლობა და განათლების კოალიცია.

საინტერესო ექსპერიმენტებს, ინტერაქციულ გამოფენებსა და შემეცნებით-გასართობ პროგრამებს ილიას სახელმწიფო უნივერსიტეტის მეცნიერები და მეცნიერების პოპულარიზაციის ჯგუფები საქართველოდან 30-მდე კარავში შემოგვთავაზებენ.

მონაწილეობას მიიღებენ ასევე საჯარო და კერძო საგანმანათლებლო და სამეცნიერო დაწესებულებები, არასამთავრობო, სახელმწიფო და კერძო ორგანიზაციები.

ღონისძიების მთავარი სცენა დღის პირველ ნახევარში დაეთმობა სამეცნიერო თემატიკაზე შექმნილ ფილმებს, ვიდეორგოლებსა და წარმოდგენებს, მათ შორის აზოტის აფეთქებასა და ამოფრქვევას. საკონფერენციო დარბაზში გაიმართება ლექციები ასტროფიზიკის, მზის ფიზიკისა და სხვა საინტერესო თემების შესახებ.

უფროსკლასელები მოუსმენენ ლექციათა ახალ კურსს თანამედროვე კოსმოლოგიაზე: „საბუნებისმეტყველო მეცნიერებათა პოპულარიზაცია ზოგად-საგანმანათლებლო სკოლაში: „შევიმეცნოთ ჩვენი სამყარო“, რომელსაც ილიას სახელმწიფო უნივერსიტეტის მკვლევრებთან ერთად ამერიკელი მკვლევრებიც წაიკითხავენ.

სწრაფი ბმულები:

• სამეცნიერო პიკნიკის სასცენო პროგრამა
• სამეცნიერო პიკნიკის თემატური კარვების განაწილების სქემა

დრო: 1 ოქტომბერი, 12:00 – 18:00

ადგილმდებარეობა: ილიას სახელმწიფო უნივერსიტეტის ეზო (ქ. ჩოლოყაშვილის გამზირი N3/5)

2022 წელი