სესხებისა და ანაბრების შედარებითი ანალიზი
ილიას სახელმწიფო უნივერსიტეტში ჩატარდა „ილიაუნი ბიზნეს რევიუს“ (IBR) მიერ მომზადებული კვლევის - “საქართველოს მიკროსაფინანსო ორგანიზაციებისა და კომერციული ბანკების სესხებისა და ანაბრების შედარებითი ანალიზის“ პრეზენტაცია.
კვლევის ფარგლებში შესწავლილ იქნა 14 კომერციული ბანკი და 14 მიკროსაფინანსო ორგანიზაცია.
კომერციული ბანკები: საქართველოს ბანკი, ბაზისბანკი, თიბისი ბანკი, ბანკი რესპუბლიკა, პროკრედიტ ბანკი, პრივატბანკი, ჰალიკ ბანკი, პროგრესბანკი, ინვესტბანკი, ბანკი ქართუ, ვითიბი ბანკი, ლიბერთი ბანკი, ბითიეი ბანკი, კორ სტანდარტ ბანკი.
მიკროსაფინანსო ორგანიზაციები: რიკო, სითი კრედიტი, ნოვაკრედიტი, მიკროკრედიტი, საქართველო, სვის კაპიტალი, ბი. აი. ჯი. კრისტალი, კრედო, ქართული კრედიტი, ალფა ექსპრესი, თბილმიკროკრედიტი, აიემჯი.
კვლევის პროდუქტები: იპოთეკური სესხი, სამომხმარებლო სესხი, ბიზნეს სესხი და ავტოსესხი.
კვლევა მიმდინარეობდა შემდეგი მეთოდოლოგიით: ვიზიტები მიკროსაფინანსო ორგანიზაციებსა და კომერციულ ბანკებში, სატელეფონო ზარები, ვებ-გვერდების ანალიზი და ე.წ. "მისტიკური კლიენტის" რანგში წინადადებების შეთავაზება.
შეჯამება:
- იპოთეკური სესხის პირობები მიკროსაფინანსო ორგანიზაციების შემთხვევაში 18-48 პროცენტის ფარგლებში მერყეობს, კომერციული ბანკების შემთხვევაში კი 12-24 პროცენტის ფარგლებში
- სამომხმარებლო სესხების პირობები მიკროსაფინანსო ორგანიზაციებში 18-42 პროცენტის ფარგლებში მერყეობს, კომერციული ბანკების შემთხვევაში ეს მაჩვენებელი 15-28 პროცენტს არ აღემატება
- ბიზნეს სესხების მაჩვენებელი მიკროსაფინანსო ორგანიზაციებში 13.2-42 პროცენტის ფარგლებში განისაზღვრება, კომერციული ბანკების შემთხვევაში 13-36 პროცენტს შეადგენს
- მიკროსაფინანსო ორგანიზაციებში განსაკუთრებულად მაღალი მაჩვენებელი ფიქსირდება ავტოსესხის შემთხვევაში, მაქსიმალური პროცენტი 96-ს უტოლდება
- იპოთეკური კრედიტის შემთხვევაში საშუალო მაჩვენებლის მიხედვით კომერციულ ბანკებში საპროცენტო განაკვეთი 15 პროცენტს, მიკროსაფინანსო ორგანიზაციებში კი 38 პროცენტს შეადგენს
- სამომხმარებლო სესხების პროცენტის საშუალო მაჩვენებლისმიხედვით კომერციულ ბანკებში საპროცენტო განაკვეთი 19 პროცენტს, მიკროსაფინანსო ორგანიზაციებში კი 33 პროცენტს შეადგენს
- ბიზნეს სესხების პროცენტის საშუალო მაჩვენებლის მიხედვით კომერციულ ბანკებში საპროცენტო განაკვეთი 16 პროცენტს შეადგენს, მიკროსაფინანსო ორგანიზაციებში კი ეს მაჩვენებელი 27 პროცენტით განისაზღვრება
- საშუალო საპროცენტო განაკვეთი სესხებზე კომერციულ ბანკებში 16 პროცენტს, მიკროსაფინანსო ორგანიზაციებში კი 37 პროცენტს შეადგენს
- ანაბრების ნაწილში საშუალო საპროცენტო განაკვეთი კომერციულ ბანკებში 9 პროცენტს, მიკროსაფინანსო ორგანიზაციებში კი 25 პროცენტს შეადგენს
კვლევა ჩატარდა 2012 წლის 10 მაისიდან 25 მაისის პერიოდში ილიას სახელმწიფო უნივერსიტეტის ბიზნესის ფაკულტეტზე არსებული ეკონომიკური კვლევებისა და კონსულტაციების ცენტრის მკვლევრების მიერ.