ახალი ამბები

15 იანვარს ილიას სახელმწიფო უნივერსიტეტის სამართლის ფაკულტეტის სტუდენტთა პირველი სამეცნიერო კონფერენციის დასკვნითი ეტაპი გაიმართა.

კომისიის წინაშე პრეზენტაციისა და სამეცნიერო კითხვა-პასუხის შემდეგ ილიას სახელმწიფო უნივერსიტეტის სამართლის ფაკულტეტის პირველი სამეცნიერო კონფერენციის გამარჯვებული მეოთხე კურსის სტუდენტები ასე გადანაწილდნენ: პირველი ადგილი – ბესიკ ქვარცხავა (ნაშრომის თემა „ქართული საპროცესო შეთანხმების ინსტიტუტი და საერთაშორისო ასპექტები“), მეორე ადგილი – თეონა ხუციშვილი (ნაშრომის თემა „სინჯარის ბავშვები“), მესამე ადგილი – ოთარ ხუციშვილი (ნაშრომის თემა „საქართველოში ბავშვის შვილად აყვანასთან დაკავშირებული პრობლემების სამართლებრივი ანალიზი“). კონფერენციაში მონაწილე ყველა სტუდენტს გადაეცა სერტიფიკატი, ხოლო გამარჯვებულებს – სერტიფიკატებთან ერთად წიგნები და სხვა საჩუქრები.

კონფერენციაზე წარმოდგენილი ნაშრომების თემატიკა მრავალფეროვანი იყო. ადამიანის უფლებები, საკონსტიტუციო ცვლილებები საქართველოში, აგრესია–როგორც არასრულწლოვანთა მიერ ჩადენილი დანაშაულის მიზეზი, დეკრეტული შვებულების სამართლებრივი მიმოხილვა, – ეს იმ საკითხების არასრული ჩამონათვალია, რომლებიც კონფერენციაზე სტუდენტებმა განიხილეს. ახალგაზრდა იურისტთა ასოციაციისა და საქართველოს იუსტიციის უმაღლესი საბჭოს წარმომადგენლებმა სტუდენტების მიერ მომზადებული სამეცნიერო ნაშრომები დადებითად შეაფასეს და მომავალი კოლეგებისთვის პროფესიული რჩევებიც არ დაიშურეს.