ახალი ამბები

ილიას სახელმწიფო უნივერსიტეტის ზოოლოგიის ინსტიტუტის თანამშრომელმა ოლეგ გორგაძემ უცხოელ კოლეგებთან ერთად მეცნიერებისათვის დღემდე უცნობი ნემატოდის ახალი სახეობა Phasmarhabditis thesamica n. sp. აღწერა. სტატია გამოქვეყნდა ჟურნალ Nematology-ში.

Phasmarhabditis thesamica n. sp. (Nematoda: Rhabditidae), a new slug nematode from southern slope of Caucasus, Georgia

ოლეგ გორგაძემ კოლეგებთან – ალბერტო ტროკოლთან, ელენე ფარელთან, ფრანჩესკა დე ლუკასა და ეუსტაჩიო ტარასკოსთან – ერთად აღწერა ნემატოდების გვარის Phasmarhabditis Andrássy, 1976-დან მეცნიერებისათვის ახალი სახეობა Phasmarhabditis thesamica n. sp. ამ გვარიდან მეცნიერთა მიერ დღემდე აღწერილია სულ 17 სახეობა, ნიადაგში მცხოვრები ფორმები – მოლუსკების, კერძოდ ლოქორებისა და ლოკოკინების ფაკულტატიური პარაზიტები. იშვიათია პათოგენური ფორმები. ახალი სახეობის ნემატოდა გამოვლენილია ლოქორას – Deroceras reticulatum-ის (Mollusca: Agriolimacidae) სხეულიდან. ლოქორები შეაგროვეს მცხეთა-მთიანეთის რაიონის სოფელ თეზამში, კერძო სექტორის ჟოლოს ბაღში.ლოქორას სხეულიდან გამოვლენილი პარაზიტული ნემატოდების მორფოლოგიურ-მორფომეტრიული კვლევა განხორციელდა ილიას სახელმწიფო უნივერსიტეტის ზოოლოგიის ინსტიტუტის ენტომოპათოგენების შემსწავლელ სამეცნიერო-კვლევით ლაბორატორიაში, ხოლო მოლეკულური – იტალიაში.

აღწერის პროცესში სინათლის მიკროსკოპზე ჩახატულ იქნა P. thesamica n. sp. მდედრის, მამრისა და ლარვის სხეულის დეტალები, გადაიღეს ფოტოსურათები და შესრულდა მორფომეტრიული განაზომები. ფილოგენეტიკური თვალსაზრისით გამოკვლეულ იქნა სამი რიბოსომული გენი: 28S rRNA, 18S rRNA, ITS და D2-D3, გაფართოებული დომენები. შედარებითი კვლევითი ანალიზის მიხედვით დადასტურდა ნემატოდი, როგორც მეცნიერებისთვის ახალი სახეობა.

2022 წელი