ახალი ამბები

სექტემბრის თვიდან დაიწყო საქართველოს საუნივერსიტეტო სპორტის ფედერაციის 2015 წლის თასის გათამაშება ფუტსალში. საასპარეზოდ თავი მოიყარეს ქვეყნის 27 უმაღლესი სასწავლებლის გუნდებმა. ილიას სახელმწიფო უნივერსიტეტის ფეხბურთელები F ჯგუფში მოხვდნენ, სადაც ზედიზედ სძლიეს სპორტის უნივერსიტეტის (4:2), კავკასიის საერთაშორისო უნივერსიტეტის (6:1), თელავის სახელმწიფო უნივერსიტეტისა (6:4) და ქართულ-ევროპული უმაღლესი სასწავლებლის (9:1) წარმომადგენლებს, ოთხ მატჩში მოაგროვეს ქულათა მაქსიმუმი - 12 (ბურთების შეფარდება - 25:8) და მერვედფინალში გრიგოლ რობაქიძის უნივერსიტეტის გუნდს შეხვდნენ. დაძაბული პაექრობა დამთავრდა ფრედ - 4:4. გამარჯვებულის გამოსავლენად დაინიშნა პენალტების სერია. ილიაუნელებმა წარმატებას მიაღწიეს ანგარიშით 5:4 და მეოთხედფინალში საქართველოს ეროვნული უნივერსიტეტის (სეუ) ფეხბურთელებს დაუპირისპირდნენ. ამ ორთაბრძოლის ძირითადი დროც ფრედ დასრულდა - 1:1. პენალტებით ილიაუნელებმა 3:2 გაიმარჯვეს და ნახევარფინალში გავიდნენ, სადაც თბილისის ღია უნივერსიტეტის გუნდთან გაარკვევენ ურთიერთობას. ნახევარფინალის მეორე წყვილია თბილისის სახელმწიფო უნივერსიტეტი (თსუ) და ბათუმის შოთა რუსთაველის უნივერსიტეტი.

შეხვედრები 14 დეკემბერს ახალ სპორტის სასახლეში გაიმართება.