”აუტიზმის ცენტრის” პრეზენტაცია
22 მაისს ილიას სახელმწიფო უნივერსიტეტში ”აუტიზმის ცენტრის” პრეზენტაცია გაიმართა.
”აუტიზმის ცენტრი” შეიქმნა ილიას სახელმწიფო უნივერსიტეტის ბაზაზე ”საქართველოს აუტიზმის ასოციაციის” მიერ. ცენტრი მიზნად ისახავს 3-დან 6 წლამდე აუტისტური სპექტრის მოშლილობის მქონე ბავშვთა ფსიქო-სოციალურ აბილიტაციას ABA-ს (გამოყენებითი ქცევის ანალიზი) მეთოდით ფსიქოლოგიური ტრენინგების მეშვეობით.
”აუტიზმის ცენტრი” უზრუნველყოფს ილიას სახელმწიფო უნივერსიტეტის ფსიქოლოგიის ფაკულტეტის სტუდენტებისთვის ABA-ს მეთოდის სწავლებას და ქმნის ბაზას მათი სასწავლო პრაქტიკისათვის. აღნიშნული მეთოდი ძალზე გავრცელებულია მსოფლიოს წამყვან საუნივერსიტეტო კლინიკებში და საქართველოშიც ნელ-ნელა მკვიდრდება.
მსოფლიო მასშტაბით აუტიზმით დაავადებულ ბავშვთა რიცხვი მნიშვნელოვნად მატულობს. კვალიფიციური სპეციალისტების ნაკლებობა კი იგრძნობა თითქმის ყველგან. ილიას სახელმწიფო უნივერსიტეტის ”აუტიზმის ცენტრის” დატვირთვაა, ჩამოაყალიბოს რესურსცენტრი აუტიზმით დაავადებულ ბავშვთა დასახმარებლად.