ახალი ამბები

15 მაისი ქართველთა შორის წერა-კითხვის გამავრცელებელი საზოგადოების დაარსების დღეა.

145 წლის წინ, 1879 წლის 15 მაისს თბილისის სათავადაზნაურო ბანკში საზოგადოების პირველ ყრილობაზე „დაწესებას“ ხელი მოაწერეს „ქშწკგ“ საზოგადეობის თავმჯდომარე დიმიტრი ყიფიანმა და გამგეობის წევრებმა : ილია ჭავჭავაძემ, იაკობ გოგებაშვილმა, ივანე მაჩაბელმა, ნიკო ცხვედაძემ და რაფიელ ერისთავმა.

საიუბილეო თარიღთან დაკავშირებით ილიას სახელმწიფო უნივერსიტეტში გაიმართა უნიკალური ციფრული პროექტის, ქართველთა შორის წერა-კითხვის გამავრცელებელი საზოგადოების პროსოპოგრაფიული ბაზის პრეზენტაცია.

იხ. https://society.iliauni.edu.ge/

პროექტის ხელმძღვანელმა, პროფესორმა ნინო დობორჯგინიძემ წაიკითხა საჯარო ლექცია: ევროპული განმანათლებლობის ისტორიისათვის საქართველოში 1879-2024.

 „ლიგამუსში“ გამართულ  ღონისძიებაზე ნინო დობორჯგინიძემ ისაუბრა ქართველთა შორის წერა კითხვის გამავრცელებელი საზოგადოების, როგორც პირველი არასამთავრობო ორგანიზაციის როლზე:

„XIX საუკუნეში, მაშინ, როდესაც არც დამოუკიდებელი სახელმწიფო გაგვაჩნდა და არც ეროვნული თვითშეგნების გამორჩეული ხარისხი,  წერა-კითხვის გამავრცელებელმა საზოგადოებამ ევროპული განმანათლებლობით გაიმარჯვა რუსეთის ორ განაპირა გუბერნიაზე  და შექმნა ახალი საქართველო ახალი ადმინისტრაციული ერთეულებით - სკოლებით, ბიბლიოთეკებით“.

https://society.iliauni.edu.ge/institutions ამ რუკაზე წარმოდგენილია ქართველთა შორის წერა-კითხვის გამავრცელებელი საზოგადოების მიერ 1879-1921 წლებში გახსნილი 652 საგანმანათლებლო დაწესებულება.

ევროპის კვირეულის ფარგლებში  გამართულ  საჯარო ლექციას დაესწრო ილიას სახელმწიფო უნვერიტეტის საპატიო დოქტორი, ქალბატონი მზექალა შანიძე. საკუთარ გამოსვლაში მან ისაუბრა წერა-კითხვის გამავრცელებელი საზოგადოების არაერთ უმნიშვნელოვანეს საგანმანათლებლო და კვლევით ინიციატივაზე, ამ ფონდის მიერ წლების განმავლობაში შეგროვებულ ხელნაწერებსა და მატერიალური კულტურის სხვა ძეგლებზე.

2024