ახალი ამბები

26 მარტს ილიას სახელმწიფო უნივერსიტეტს ეწვია იენის ფრიდრიხ შილერის სახელობის უნივერსიტეტის (გერმანია) წარმომადგენელთა დელეგაცია.

ვიზიტი განხორციელდა გერმანიის მთავრობის მიერ დაფინანსებული პროექტის ფარგლებში: “Preserving Tradition – Securing the Future: Sustainable Development of the German-Georgian Scientific Network Tbilisi / Jena (DGW) ”, რომლის მიზანია გერმანულ-ქართული სამეცნიერო და საგანმანათლებლო პროექტების განვითარება და უნივერსიტეტებს შორის ერთობლივი კვლევების წახალისება.

ვიზიტის ფარგლებში ჩატარდა ერთდღიანი სემინარი ორ უნივერსიტეტს შორის მიმდინარე თანამშრომლობის განხილვისა და ახალი ინიციატივების განვითარების მიზნით. ღონისძიებას დაესწრნენ ილიას სახელმწიფო უნივერსიტეტის პროფესორები და მკვლევრები, რომლებიც სხვადასხვა მიმართულებით უკვე თანამშრომლობენ იენის უნივერსიტეტთან ან გეგმავენ სამომავლო პროექტების განხორციელებას.

იენის ფრიდრიხ შილერის სახელობის უნივერსიტეტთან თანამშრომლობა უკვე მოიცავს პროგრამის ერაზმუს+ ფარგლებში სტუდენტთა და პროფესორთა გაცვლებს სხვადასხვა მიმართულებით, გერმანული ენის მასწავლებელთა მოსამზადებელ ინტენსიურ პროგრამას “Deutsch Lehren Lernen” და სხვა მნიშვნელოვან პროექტებს.

2025