სიახლეები

ილიას სახელმწიფო უნივერსიტეტმა დაიწყო  ACTS პროექტი. კონსორციუმის პარტნიორები პროექტის პირველ შეხვედრაზე 2026 წლის 13-14 ოქტომბერს ერევანში, სომხეთში შეიკრიბნენ. შეხვედრით დაიწყო ხუთწლიანი საერთაშორისო თანამშრომლობა, რომლის მიზანია თამბაქოს მოხმარების შეწყვეტის მტკიცებულებებზე დაფუძნებული სერვისების ყოველდღიურ სამედიცინო მომსახურებაში დანერგვა.

პროექტის სრული სახელწოდებაა „თამბაქოს მოხმარების შეწყვეტის დაჩქარება ევროპის დაბალი და საშუალო შემოსავლის მქონე ქვეყნების ჯანდაცვის სისტემებში: მრავალქვეყნიანი იმპლემენტაცია-ეფექტურობის კვლევა“ (Accelerating Tobacco Cessation within Healthcare Systems of European LMICs: A Multi-Country Effectiveness Trial). ACTS დაფინანსდა Horizon Europe პროგრამის ფარგლებში და 158 განაცხადიდან შერჩეულ 4 გამარჯვებულ პროექტს შორის მოხვდა, რაც ილიას სახელმწიფო უნივერსიტეტისა და მისი პარტნიორების მნიშვნელოვანი წარმატებაა.

პროექტს ილიას სახელმწიფო უნივერსიტეტი და ჰამბურგ-ეპენდორფის საუნივერსიტეტო კლინიკა ერთობლივად ხელმძღვანელობენ. პროექტის სამეცნიერო ხელმძღვანელია დავით ოთიაშვილი. ACTS იმპლემენტაციის კვლევის თანამედროვე მიდგომებს იყენებს იმის შესასწავლად, თუ როგორ შეიძლება თამბაქოს მოხმარების შეწყვეტის ეფექტიანი მხარდაჭერა ყოველდღიურ სამედიცინო პრაქტიკაში დაინერგოს და დამკვიდრდეს.

მასშტაბური კვლევა ოთხ ქვეყანაში განხორციელდება: საქართველოში, სომხეთში, სერბეთსა და ალბანეთში. კვლევა შეაფასებს როგორც ჯანდაცვის სისტემებში თამბაქოს მოხმარების შეწყვეტის სერვისების დანერგვას, ისე მათ ეფექტიანობას პაციენტებისთვის. მტკიცებულებებზე დაფუძნებული მკურნალობის ყოველდღიურ კლინიკურ პრაქტიკაში დანერგვით ACTS მიზნად ისახავს არაგადამდები დაავადებების მძიმე ტვირთის შემცირებას.

კონსორციუმი აერთიანებს 12 პარტნიორს 9 ქვეყნიდან (საქართველო, გერმანია, ალბანეთი, სომხეთი, სერბეთი, ბელგია, ჩეხეთი, იტალია და დიდი ბრიტანეთი). პარტნიორობა აკავშირებს კვლევისა და ჯანდაცვის სფეროების გამოცდილებას თამბაქოს მოხმარების შეწყვეტის სერვისების გრძელვადიანი გაუმჯობესებისთვის.

ACTS ასევე იმუშავებს ჯანდაცვის სისტემების გაძლიერებასა და თამბაქოს მოხმარების შეწყვეტის ეფექტიანი დახმარების ხელმისაწვდომობის გაზრდაზე.

2026