ღონისძიებები

30 მაისს, 12:00 საათზე, წიგნის მაღაზია ”ლიგამუსში” (ი. ჭავჭავაძის გამზ. 32) გაიმართება შეხვედრა ამერიკელ მწერალ ქეთრინ შულცთან. ავტორი წარადგენს თავის წიგნს ”როცა ცდები”, რომელიც ახლახან ქართულ ენაზე გამოიცა არასამთავრობო ორგანიზაცია ”რადარამის” მიერ.

ქეთრინ შულცი ფილოსოფიის ფაკულტეტის კურსდამთავრებული, ჟურნალისტი, მწერალი და ბლოგერია. ის წერს ისეთი ცნობილი გამოცემებისთვის, როგორებიცაა: New York Times Magazine, The Nation, Foreign Policy. ქეთრინ შულცი საქართველოს "რადარამის" მოწვევით ესტუმრა და შეხვედრები ექნება სტუდენტებთან, ლექტორებთან, მწერლებთან და მისი წიგნის მკითხველებთან სხვადასხვა ქალაქებში.

მოკლედ წიგნის შესახებ:

ფილოსოფია, ფსიქოლოგია, რელიგია, მედიცინა, პოლიტიკა, ყოველდღიური ცხოვრება - ის სფეროებია, რომელთა მრავალფეროვანი მაგალითებით ქეთრინ შულცი გვიხსნის, რომ შეცდომა ადამიანური ფენომენია. წიგნში ,,როცა ცდები" ის შეცდომის ორ მოდელს განიხილავს: პესიმისტურსა და ოპტიმისტურს. პირველი ხაზს უსვამს შეცდომის საბედისწერო ხასიათს, ხოლო მეორის მიხედვით, შეცდომას არცთუ ისე დიდი მნიშვნელობა აქვს ადამიანის ცხოვრებაში. ის გვთავაზობს პასუხს კითხვებზე - რატომ არის შეცდომა ადამიანისთვის შემეცნების ერთ-ერთი გზა და არა დაბრკოლება? როგორია შეცდომის მექანიზმი, რომელსაც საბოლოოდ ჩვენი გარდაქმნაც კი შეუძლია?

,,რადარამის“ შესახებ:

”როცა ცდები ” ,,რადარამის” ყოველთვიური წიგნების სერიის მესამე წიგნია.

,,რადარამი” ქართული არასამთავრობო ორგანიზაციაა, რომელმაც დაიწყო უკანასკნელი წლების არამხატვრული ჟანრის ლიტერატურის ქართულ ენაზე თარგმნა და ბეჭდვა. წიგნები ისეთ აქტუალურ თემებს ეხება, როგორიცაა: გლობალიზაცია, ეკონომიკა, გარემოს დაცვა, პოლიტიკა, მეცნიერება, ფსიქოლოგია და სხვა. თითოეული მათგანი ისეთი ენითაა დაწერილი, რომ არ მოითხოვს კონკრეტული საკითხის პროფესიონალურ დონეზე ცოდნას და გასაგებია ყველა დაინტერესებული ადამიანისათვის.