ღონისძიებები

30 აპრილს 19:00 საათზე, ილიას სახელმწიფო უნივერსიტეტის წიგნის სახლში ლიგამუსი, ილიაუნის ლიტერატურული კლუბი სტუმრად იწვევს უნივერსიტეტის რექტორს, ფილოსოფოს გიგა ზედანიას. მომხსენებელი უილიამ ფოლკნერის რომანის - ”დროშები მტვერში“ - შესახებ ისაუბრებს. რომანი, რომელიც ზაზა ჭილაძემ თარგმნა, ილიაუნის ლიტერატურული პრემიის ფინალისტია.

ფოლკნერს ზოგჯერ "ამერიკელ შექსპირად" მოიხსენიებენ. XXI საუკუნის გადმოსახედიდან, იგი არა მხოლოდ გასული საუკუნის საუკეთესო ამერიკელ მწერლად გვევლინება, არამედ, ალბათ - საუკეთესო მწერლად მთლიანად ამერიკული ლიტერატურის ისტორიაში. 

ლექცია დაეთმობა ფოლკნერის ზაზა ჭილაძის მიერ ქართულად თარგმნილ რომანს "დროშები მტვერში" - სრულ ვარიანტს წიგნისა, რომელსაც მკითხველი აქამდე იცნობდა სათაურით "სარტორისი". ეს ფოლკნერის რიგით მესამე რომანია, მაგრამ პირველი, რომელშიც მოქმედება მწერლის მიერ გამოგონილ იოკნაპატოფას ოლქში ხდება. ესაა რომანი, რომელსაც მოსდევს "ხმაური და მძვინვარება" -  წიგნი, რომელშიც პირველად გამოვლინდა ფოლკნერის, როგორც მწერლის, ლიტერატურული შესაძლებლობები, წიგნი, რომელშიცერთი ოჯახის ქრონიკის ფორმა გამოყენებულია, როგორც მეტაფორა ქვეყნისა და სამყაროს სტრუქტურის აღსაწერად: ისევე, როგორც ეს მოხდება ფოლკნერისავე რომანში"აბესალომ! აბესალომ!" ან გარსია მარკესის რომანში "მარტოობის ასი წელიწადი".

დრო: 30 აპრილი 19:00 საათი

ადგილმდებარეობა: წიგნის სახლი ”ლიგამუსი”

დასწრება თავისუფალია.