განცხადებები

ილიას სახელმწიფო უნივერსიტეტის შედარებითი ლიტერატურის ინსტიტუტი, საქართველოს პარლამენტის ეროვნულ ბიბლიოთეკასთან და გიორგი ლეონიძის ქართული ლიტერატურის სახელმწიფო მუზეუმთან თანამშრომლობით გიწვევთ მონაწილეობის მისაღებად შედარებითი ლიტერატურის მე-2 საერთაშორისო კონფერენციაში: „ლიტერატურა და კულტურა: მოდერნიზმი/ავანგარდიზმი - მემკვიდრეობა და დღევანდელობა; პოსტკოლონიალური დისკურსი და პოსტკოლონიური რეალობა“.

კონფერენცია ჩატარდება ილიას სახელმწიფო უნივერსიტეტში და საქართველოს პარლამენტის ეროვნულ ბიბლიოთეკაში 2011 წლის 26-28 აპრილს.

კონფერენციის პლენარული მომხსენებელია ბრისტოლის უნივერსიტეტის წამყვანი მეცნიერი, ჰაბილ. დოქტორი გიუნთერ ბერგჰაუსი.

მოხსენებათა თემატიკა შეუზღუდავია. მიიღება ინტერკულტურული / ინტერდისციპლინარული ხასიათის მოხსენებები, მათ შორის - საქართველოსა თუ მსოფლიოში მოდერნიზმის, ავანგარდიზმის, პოსტმოდერნიზმის, პოსტკოლონიალიზმის თემებზე.

კონფერენციის ფარგლებში გაიმართება თემატური სესიები: ”მოდერმიზმი/ავანგარდიზმი - მემკვიდრეობა და დღევანდელობა”; ”პოსტკოლონიალური დისკურსი და პოსტკოლონიური რეალობა“.

კონფერენციის ფარგლებში საქართველოს პარლამენტის ეროვნულ ბიბლითეკაში და გიორგი ლეონიძის ქართული ლიტერატურის სეხელმწიფო მუზეუმში გაიმართება საქართველოში მოდერნიზმის/ავანგარდიზმის პერიოდთან დაკავშირებული მასალების გამოფენა.

კონფერენციაში მონაწილეობის მისაღებად გთხოვთ 25 თებერვლამდე გამოგზავნოთ განაცხადი: მოხსენების თეზისები - 200 სიტყვა, 5 საკვანძო სიტყვის, კვლევის თემატური არეალების მითითებით; მონაცემები: სახელი და გვარი, აკადემიური ხარისხი, დასაქმების ადგილი და საკონტატო ინფორმაცია.

დოქტორანტებს გთხოვთ, გამოგზავნოთ განაცხადი სამეცნიერო ხელმძღვანელის რეკომენდაციის თანხლებით.

გთხოვთ, განაცხადი ელექტრონული სახით გამოგზავნოთ მისამართზე: complit@iliauni.edu.ge.

შესარჩვევი კომისიის გადაწყვეტილება გეცნობებათ 1 მარტამდე.

კონფერენციის სამუშაო ენებია ქართული და ინგლისური. თემატური სესია ”მოდერნიზმი/ავანგარდიზმი - მემკვიდრეობა და დღევანდელობა” ჩატარდება ინგლისურ ენაზე.

მოხსენებლებს, რომლებიც ქართულად წაიკითხავენ მოხსენებას, ვთხოვთ, 24 აპრილამდე გამოგზავნონ ვრცელი (ორგვერდიანი) ინგლისურენოვანი რეზიუმე.

კონფერენციის მხარდამჭერები არიან: ილიას სახელმწიფო უნივერსიტეტი, რუსთაველის ფონდი, საქართველოს პარლამენტის ეროვნული ბიბლიოთეკა, გიორგი ლეონიძის ქართული ლიტერატურის სახელმწიფო მუზეუმი.