სიახლეები

ილიას სახელმწიფო უნივერსიტეტის სამართლის სკოლამ წარმატებით გააგრძელა მონაწილეობა ჰააგაში გამართულ „ტელდერსის“ საერთაშორისო სამართლის იმიტირებულ პროცესში (Telders International Law Moot Court Competition).

პრესტიჟული შეჯიბრება, რომელიც გაეროს სამართლის საერთაშორისო სასამართლოს საქმიანობის იმიტაციას ასახავს, წელს 48-ედ გაიმართა და მსოფლიოს სხვადასხვა უნივერსიტეტის გუნდებს უმასპინძლა.

2024 წლის საქმის არსი მოიცავდა აქტუალურ და კომპლექსურ საკითხებს, მათ შორის — საერთაშორისო საზღვაო სამართალს, კლიმატის ცვლილებებს, ადამიანის უფლებებსა და სახელმწიფოთა პასუხისმგებლობას გაეროს წესდებით გათვალისწინებული ვალდებულებების შესრულების კონტექსტში.

ილიაუნის გუნდის შემადგენლობაში იყვნენ სამართლის ბაკალავრიატის მესამე კურსის სტუდენტი ზურაბ მისაკიანი და მაგისტრატურის პირველი კურსის სტუდენტები — მარიამ კობერიძე და ნინო შელია. მათი აკადემიური და პრაქტიკული მომზადება მარიამ ტაგანაშვილმა და ქეთევან ბეჟაშვილმა უზრუნველყვეს, ხოლო გუნდის საერთო კოორდინაცია თინათინ გოლეთიანმა, სამართლის სკოლის ასოცირებულმა პროფესორმა, ითავა.

საერთაშორისო რაუნდების ფარგლებში, ილიაუნის სტუდენტებს შესაძლებლობა ჰქონდათ ეთათბირათ ევროპის წამყვანი უნივერსიტეტების წარმომადგენლებთან — მათ შორის გერმანიის, ინგლისის, ესპანეთისა და სხვა ქვეყნების აკადემიურ გუნდებთან.

გუნდის მონაწილეობა შესაძლებელი გახდა იურიდიული კომპანია Andersen-ის მხარდაჭერით, რომლის ფინანსურმა და მორალურმა წვლილმა მნიშვნელოვანი როლი ითამაშა სტუდენტური გამოცდილების სრულფასოვნად განხორციელებაში. უნივერსიტეტი მადლობას უხდის პარტნიორ კომპანიას და იმედს გამოთქვამს, რომ წარმატებული თანამშრომლობა მომავალშიც გაგრძელდება.

„ტელდერსის“ იმიტირებული პროცესი სტუდენტებისთვის უნიკალურ შესაძლებლობას ქმნის — არა მხოლოდ თეორიული ცოდნის გაღრმავების, არამედ კვლევითი, წერითი და ზეპირი არგუმენტაციის უნარების განვითარებისთვისაც, რაც მათ პროფესიულ წინსვლაში მნიშვნელოვან საფუძველს ქმნის.

ილიას სახელმწიფო უნივერსიტეტის სამართლის სკოლა მომავალშიც ერთგულად გააგრძელებს სტუდენტების საერთაშორისო გამოცდილებების ხელშეწყობას და აკადემიური წარმატებების მხარდაჭერას.

2025