ახალი ამბები

„რომ ჩამოდიხარ  მთის ძირში,  ხვდები, რომ მთა კი არ გადალახე, გადალახე შენი სისუსტეები და შენ უკვე მზად ხარ შემდეგი მიზნებისთვის, რომლებიც შეიძლება ბევრად რთული იყოს“ - არჩილ ბადრიაშვილი

2024 წლის შემოდგომის სემესტრიდან  ილიას სახელმწიფო უნივერსიტეტმა  დააფუძნა „ადიქციის კვლევების“ სამაგისტრო პროგრამის კურსდამთავრებულისა და მკვლევრის, სვანეთში ტრაგიკულად დაღუპული არჩილ ბადრიაშვილის სახელობის სტუდენტური სტიპენდია.

ამ სტიპენდიის მოპოვება ყოველწლიურად შეეძლება ილიაუნის საბაკალავრო საფეხურის სტუდენტებს საქართველოს მთიანი რეგიონებიდან, მათ შორის სვანეთიდან, რომელთანაც არჩილს განსაკუთრებული სიყვარული აკავშირებდა.

არჩილ ბადრიაშვილი მსოფლიოში აღიარებული ახალგაზრდა ალპინისტი იყო. მის სახელს უკავშირდება არაერთი უნიკალური ალპინისტური მარშრუტი და გაუკვალავ მწვერვალებზე პირველასვლა, რისთვისაც იგი დაჯილდოებულია ალპინიზმის „ოსკარად“ წოდებული ოქროს წერაყინით.

არჩილი გამორჩეული ავტორია, რომელმაც ქართული ალპინიზმის ისტორიის უმნიშვნელოვანესი მიღწევები გააცნო მსოფლიოს ცნობილი საერთაშორისო ალპინისტური ჟურნალებისა და გამოცემების მეშვეობით.

2024 წლის თემა

არჩილ ბადრიაშვილის სახელობის სტიპენდიის ფოკუსი  2024 წელს იქნება სვანეთის რეგიონის მთების მრავალფეროვნება. შეირჩევა თემით დაინტერესებული სტუდენტი სვანეთის რეგიონიდან, რომელსაც დაუფინანსდება სწავლის საფასური  (2250 ლარი) ერთი წლის განმავლობაში.

ვის შეუძლია  მონაწილეობა?  

•  ილიას სახელმწიფო უნივერსიტეტის საბაკალავრო საფეხურის სტუდენტს;
• სვანეთის რეგიონის მცხოვრებს;
• კანდიდატმა უნდა წარადგინოს პროექტი ალპინიზიმის ან/და სვანეთის თემატიკის  (ბლოგი, ვლოგი, კვლევა, ფოტო/ვიდეორეპორტაჟი) შესახებ;
• მაღალი აკადემიური მოსწრების მქონე სტუდენტს.

კონკურსის ეტაპები

პირველი ეტაპი: დოკუმენტების წარდგენა

აპლიკანტებმა უნდა შეავსონ სარეგისტრაციო ფორმა და წარმოადგინონ ბიოგრაფია და  სამოტივაციო წერილი, რომელშიც დასაბუთებული იქნება სტიპენდიის მიღების  სურვილი და სამუშაო მონახაზი.    

მეორე ეტაპი: ინტერვიუ შერჩეულ კანდიდატებთან

შერჩეული კანდიდატები დარგის სპეციალისტებს გასაუბრებაზე გააცნობენ ხედვას, რას გააკეთებენ სტიპენდიით გათვალისწინებულ ერთწლიან პერიოდში.

მესამე ეტაპი: გამარჯვებულის გამოვლენა

კონკურსანტის შეფასების კრიტერიუმები:

პროექტის ორიგინალურობა, ცოდნა ალპინიზმის შესახებ, მოტივაციის დასაბუთება.

განაცხადის პროცედურა

კონკურსში მონაწილეობის მსურველებმა უნდა შეავსონ სარეგისტრაციო ფორმა: https://shorturl.at/FLImx

რეგისტრაციის ბოლო ვადა: 01.11.2024, 23:59  

 დაგვიანებით გამოგზავნილი ან არასრული განაცხადები არ განიხილება.

სარეგისტრაციო ფორმა  იხ. ლინკი https://shorturl.at/FLImx

2024